Саха Өрөспүүбүлүкэтин 100 сааһын чэрчитинэн, Чурапчытааҕы «Улыбка» уһуйаан  кыра саастаах оҕолорго туһаайан, төрөөбүт дойду географиятын, дойду уратытын билиһиннэрэр сыаллаах «Уруйдуун улуустарынан айан» диэн чэбдигирдэр тэттик мультфильмнары оҥорон таһаарарын саҕалаата. Бу бырайыак  кыра саастаах оҕоҕо  төрөөбүт дойду  историятын, уратытын билиһиннэрэрин таһынан, төрүт тыл сүмэтин иҥэриигэ, оҕо тылын саппааһа байыытыгар туһуланна.  Өссө биир сүҥкэн суолтатынан,  хаҥсык кэмигэр ордук кыра саастаах оҕолор дьиэҕэ олорон үөрэммиттэрин  түмүгэр ыйааһыннара эбиллэн, доруобуйалара айгырыырын туһунан чинчийиилэргэ тирэҕирдэ.  

     Аныгы кэм тэтиминэн, уһуйааммыт Медиадетский сад «Улыбка» диэн проегынан иитээччи, педагог төрөөбүт тылынан оҕолорго аналлаах контены оҥоруута тэтимирэн, сайдан иһэригэр соруктанан, үлэлээн-хамсаан кэллэ. Ол эрэн, аныгы технологияларынан уһуйааннары хааччыйыы кэккэ күчүмэҕэйдэри үөскэтэриттэн төрүөттэнэн, уһуйаан сэбиэдиссэйэ Иванова Екатерина Семеновна, методиһа Иванова Нюргуяна Константиновна тутулуга суох кэмиэрсийэтэ суох тэрилтэ тэрийэннэр, граҥҥа кыттыыны ылар кыахтаммыппыт. «Фонд культурных инициатив» күрэххэ кыттан, граҥҥа тиксэн,  бырайыактары олоххо киллэрии үлэтэ саҕаланна. Ол курдук «Уруйдуун улуустарынан айан» бырайыакпыт Сахабыт сирин бары улуустарын хабан, 35 тэттик сиэрийэттэн турар. Уһуйааммыт педагогтара бары улуустары сыныйан үөрэтэн, кыра саастаах оҕоҕо өйдөнүмтүө тыллаах-өстөөх тэттик хоһооннору суруйдулар. Бу хоһооннору иитээччилэрбит оҕолорбутугар үөрэтэн, музыкальнай салайааччыларбыт аудиозписька устан, сороҕун ырыа оҥорон үөрэтэн, ыллатан мультфильмнарга уган иһэбит. Физруктарбыт ырыаҕа, хоһооҥҥо чэбдигирдэр хамсаныылары толкуйдаан, суруйан, оҕолору хамсатан, устан эмиэ контеммытыгар уган  иһэллэр. Уонна саамай оҕону угуйар, интириэһин тардара мультфильм буолар. Манна анал программаҕа эбии үөрэхтээһин педагогтара мультфильмнары оҥороллор. Билиҥҥи туругунан 20-чэ улуус хабыллан мультфильмнэр тиһигин быспакка тахса тураллар. Сахабыт сирин хас биирдии уһуйааныгар, алын кылааһыгар дьарык, урок быыһыгар күннэтэ туттуллар сахалыы чэбдигирдэр хамсаныыларбыт оҕолорбут доруобуйаларын тупсардынар, дойдуларын туһунан чиҥ билиини ылалларыгар төһүү буоллунар, төрүт тылынан саҥалара сайда  турдун диэн эрэллээхпит.

     Плейлист ссылката:  https://youtube.com/playlist?list=PL3-Pl_vwwEhnDxtqSZMAO1Ym2qQQe5V8R